Númeru identifikasaun Seguransa Sosiál (NISS) traballadór no sidadaun sira-nian mak númeru ne’ebé atribuidu bainhira halo inskrisaun iha sistema seguransa sosiál, hanesan tuirmai ne’e:
- Manuálmente – servisu INSS sira-nian halo inskrisaun no fó NISS
- Automatikamente – iha futuru, kontribuinte sira bele asesu ba inskrisaun online no ba sira-nia NISS (Online iha prosesu konstrusaun)
Agora daudaun, iha prazu semana ida nia laran hafoin inskrisaun, Seguransa Sosiál komunika NISS ba interesadu sira ho maneira hanesan tuirmai ne’e:
- ENIN: liuhusi email
- Traballadór sira ne’ebé halo inskrisaun fakultativa iha rejime jerál: liuhusi email
- Traballadór por konta de outrém: liuhusi email ba sira-nia entidade empregadora. Traballadór ne’ebé servisu por konta de outrém presiza, depois, husu nia NISS rasik ba rekursus umanus entidade empregadora nian
- Sidadaun sira ne’ebé inklui iha rejime naun-kontributivu: prezensialmente, iha postu atendimentu seguransa sosiál sira-nian iha Díli, iha munisípiu sira no iha RAEOA
Ba kazu saida de’it, kontribuinte (ENIN, traballadór por konta de outrém no traballadór ho inskrisaun fakultativa iha rejime kontributivu) no sidadaun sira ne’ebé inklui iha rejime naun-kontributivu bele mós kontaktu diretamente Seguransa Sosiál hodi husu sira-nia NISS. Kontaktu ho Seguransa Sosiál bele prezensialmente, iha postu atendimentu Seguransa Sosiál nian iha Díli, iha munisípiu sira no iha RAEOA, ka liuhusi email ba seguranca.socialtl@gmail.com.
Ba traballadór nasionál ne’ebé hala’o sira-nia atividade profisionál iha estranjeiru, hafoin inskrisaun no atribuisaun NISS nian, Seguransa Sosiál komunika númeru ne’e ba traballadór liuhusi email.
